Um okkur
Farsæld er húmanískt lífsskoðunarfélag byggt á lífsskoðunum á grunni raunhyggju um siðferði og þekkingu og félagið mun leggja áherslu á menntastarf og umræðu um siðferðileg málefni í samfélaginu. Félagið var stofnað 23. mars 2025, í Safnahúsi, Reykjavík. Félagslög þess byggja á blöndu af rökræðulýðræði og málefnalegu atkvæðalýðræði.
Með nafninu Farsæld er vísað til þroskaferils manneskjunnar og ferli siðferðilegrar fágunar samfélagsins til að blómstra!
Farsæld er stofnað til að vera vettvangur fyrir umræðu og lærdóm um þau gildi sem skipta fjölskyldur í samfélaginu verulegu máli og hafa áhrif á líf okkar. Um þau mótum við lífsskoðanir og reynum að lifa í samræmi við þær. Við teljum að góðar lífsskoðanir skipti verulegu máli fyrir gott líf. Við viljum sameinast um þær og efla manngerð (karakter) okkar til að sigla farsællega í gegnum þann ólgusjó sem lífið getur einkennst af. Við viljum hjálpast að við að blómstra í lífinu og ná markmiðum okkar. Til þess þykir okkur mikilvægt að huga að hugsunum okkar og eiga um þær samræður, en í því felst heimspekilegur lífsmáti. Sjá nánar á síðunni Grundvöllur.
Við bjóðum upp á athafnastjórnun í samræmi við þessa lífsskoðun. Sjá síðu um athafnaþjónustuna.
Stjórn Farsældar
(uppfært 17. sept. 2025. Helga Jóhanna tók við sæti í aðalstjórn)
Aðalstjórn
-
Svanur Sigurbjörnsson, formaður
-
Sævar Ari Finnbogason, varaformaður
-
Unnur Hjaltadóttir, fulltrúi
-
Júlía Linda Ómarsdóttir, gjaldkeri
-
Helga Jóhanna Úlfarsdóttir
Varamenn
-
Jóhann Björnsson
Úr stofnsamþykktum: Viðmið Farsældar um starf og starfshætti stjórnar og ráða.
Nafn félagsins er dregið út frá hugtaki siðfræðikenningar sem kallast heillahyggja eða farsældarhyggja. Kenningin á upptök sín í dygðasiðfræði Aristótelesar og fellur einnig undir svokallaða markhyggju. Samkvæmt henni skyldi hver manneskja hafa það að markmiði að efla siðferðilega dómgreind sína (siðvitið) og siðferðilega ábyrga afstöðu (eins og góðvilja, kjark, réttsýni o.s.frv.) í gegnum lífið. Manneskjan skyldi stefna að uppfyllingu góðra markmiða og skila því í þágu allra, ekki bara sjálfs síns. Þroskun og fágun siðferðis manneskjunnar er markmið hennar út lífið og með því næst farsældin (eudaimonia á Forn-grísku), sem er ákveðin gerð hamingju. Segja má að markmiðið sé að blómstra í lífinu og bæta samfélagið í leiðinni, enda erfitt að blómstra við slæm skilyrði. Þessi blómstrun til farsældar (flourishing) er því áberandi í táknum félagsins.
Þú, lesandi góður, getur gerst félagi í Farsæld, deilir þú þessum lífsskoðunum með félaginu og vilt með aðild þinni styrkja markmið þess og starfsemi. Sjá á skráningarsíðu.
Nánari lýsing á skilgreiningu félagins, tilgangi og markmiðum er á síðunni Grundvöllur hugmynda Farsældar.
